گھر پلاٹ وغیرہ کسی کے نام کرنا حکمِ ھبہ رکھتا ہے اور ھبہ میں قبضہ شرط ہے اگر دادا نے یہ مکان محض کاغذات میں بیوی کے نام کیا اور قبضہ نہ دیا تو یہ مکان دادا کی ملکیت ہے ، دادی کا اس میں کوئی شرعی حق نہیں ۔اور بالخصوص جب داد خود بھی اس میں رہتا رہا اور اپنا مال و اسباب بھی اسی میں رکھا اور کبھی تخلیہ کرکے زوجہ کو قبضہ نہ دیا حتٰی کہ زوجہ کا انتقال ہوگیا تو یہ ھبہ از سر باطل ہوگیا۔اب یہ مکان خاص ملکِ شوہر ہے بعد وفات شوہر اسکے ورثاء میں بحسبِ فرائض ورثاء منقسم ہوگا۔

تقسیم کی تفصیل یہ ہے کہ جن افراد کا انتقال دادا کی زندگی میں ہوا ان میں سے کوئی بھی شرعاً دادا کی وراثت کا حقدار نہ ہوگا، لہذا دونوں بیویاں ، بیٹا اور بیٹی دادا کی وراثت سے کچھ حصہ نہ پائیں گے جبکہ ساری وراثت پوتے اور پوتیوں کے درمیان تقسیم ہوگی۔ جسکی تفصیل یہ ہے کہ کل وراثت کے 11 حصے ہونگے جس میں سے ہر پوتے کو 2 حصے اور ہر پوتی کو ایک حصہ ملے گا۔

الہدایۃ شرح بدایۃ المبتدی میں ہے:ويقسم ماله بين ورثته الموجودين في ذلك الوقت ومن مات قبل ذلك لم يرث منه :ترجمہ: اور میت کا مال اس کے ان ورثاء میں تقسیم ہوگا جو اسکی موت کے وقت موجود (زندہ) تھے اور جو ا س کی موت سے پہلے مرگئے وہ اس کے وارث نہیں ہونگے (لہذا ان میں وراثت تقسیم نہیں ہوگی)۔( الہدایۃ شرح بدایۃ المبتدی کتاب المفقود جلد 2ص 424)

یوں ہی البنایہ شرح الہدایہ میں اسی کے تحت ہے:وقسم ماله بين ورثته الموجودين في ذلك الوقت)أي وقت الحكم بالموت۔ترجمہ:اور اسکا مال اسکے ان ورثاء میں تقسیم کیا جائے گا جو اس(مورث)کی موت کے وقت موجود ہوں۔ (البنایہ شرح الہدایہ جلد 7ص367)

لڑکے لڑکیوں کے بارے میں ارشاد فرمایا:یُوصِیکُمُ اللَّہُ فِی أَوْلَادِکُمْ لِلذَّکَرِ مِثْلُ حَظِّ الْأُنْثَیَیْنِ ۔ ترجمہ کنز الایمان :۔ اللہ تعالی تمہیں حکم دیتا ہے تمھاری اولاد کے بارے کہ بیٹے کا حصہ دو بیٹیوں برابر ہے۔

السراجی فی المیراث ص19میں ہے:ومع الابن للذکر مثل حظ الانثیین۔ ترجمہ: اور للذکر مثل حظ الانثیین کے تحت بیٹی کو بیٹے کے حصے کا نصف ملے گا۔

واللہ تعالٰی اعلم بالصواب

کتبـــــــــــــــــــــــــــہ:محمد زوہیب رضا قادری

الجواب الصحیح:ابو الحسنین مفتی وسیم اختر المدنی

تاریخ اجراء:13ربیع الاول1446ھ/ 18ستمبر2024 ء